څه د جلوس، څه د جلسې، څه د غزا شهیدان
مونږ بې هنرو پښتنو سره بلها شهیدان
ـ
په میدان ما جنګوي ماله شاباسې راکوي
خو د میدان په وېش کې نه مني زما شهیدان
ـ
زه د خپل یو یو ارمان، یو یو څلے ښه پېژنم
په خپلو لاسو مې ښخ کړي د وفا شهیدان
ـ
مونږه د یو جنګه خبر نه شو چې چا وګټو؟
مونږه د هره جنګه راوړه د دنیا شهیدان
ـ
مونږ د دې دور د فرات په غاړه مړه د تندې
مونږ د دې دور د تاریخ د کربلا شهیدان
ـ
خپل پردي کوم یو زورور پکې سر وو نه خوړو
دا د کابل شهیدان ښکاري په رښتیا شهیدان
ـ
چرته د یو څلي به پورته شي شغله د رڼا
په دې تیارو کې دې هېر مه شه د رڼا شهیدان
ـ
نن سبا ډیر زورور نه مني رښتیا خبره
مونږه په نن سبا کې واخله خامخا شهیدان
صاحب شاه صابر
ایک تبصرہ شائع کریں