پروفيسر ډاکتر اباسین یوسفزے
پتنګ د ځان پېژندګلۍ له پۀ لمبو پسې ځي
رڼا تېره توره پۀ لاس کښې پۀ تیارو پسې ځي
ـ
څوک چې لاسونه تپوي او قدمونه اخلي
زما اولس پۀ پټو سترګو پۀ هغو پسې ځي
ـ
ملګرو کرښه به راکاږو سپیناوے به کوو
چې پۀ کُرسو پسې څوک ځي کۀ پۀ پښتو پسې ځي
ـ
هغه سړے به خامخا چرته لېوان ماتوي
څوک چې د غرونو پۀ طرف پۀ لېونو پسې ځي
ـ
چا چې بلبل پۀ سترګو هم چرې لیدلے نۀ وي
نو مجبوراً به د زاغانو ترانو پسې ځي
ـ
اوس به تاریخ پۀ اوښکو، وینو باندې نۀ لیکمه؟
چې د شملو ښاغلي نن پۀ لوپټو پسې ځي
ـ
کۀ څۀ کمال لرې نو سر کاڼو ته ټینګ ونیسه!
دلته کښې خلک ژوندي نۀ مني پۀ مړو پسې ځي
ـ
د اباسین غاړې له راشه چې زړګے دې یخ شي
اوبۀ پۀ تږي پسې نه، تږے اوبو پسې ځي
Post a Comment