غزل ـ ارواښاد سيف الرحمن سليم
ـ
دې بې کچه اضطراب کې لږ سکون راله پيدا کړئ
ميکدې پله څوک ورشئ لږ ژوندون راله پيدا کړئ
ـ
زه يواځې شومه خلکه يو ملګرے مې پکار دے
دانشورو نه مې بچ کړئ څوک مجنون راله پيدا کړئ
ـ
د جومات استاذ عرب دے په مکتب کې ډهلي وال دے
يو استاذ راله پيدا کړئ خو پښتون راله پيدا کړئ
ـ
د باچا ګډې تالا شوې شرمخان ورته ګډېږي
چې شپېلۍ کې يې تاثير وي هغه شپون راله پيدا کړئ
ـ
تورې زلفې به کړم هيرې ميکدې نه به توبه کړم
چې خيالونه مې سپرلي کړي څه مضمون راله پيدا کړئ
ـ
ـ
Post a Comment